الاثنين، 6 يونيو 2011

اسكتش احمر

كان عندى يوم اسكتش احمر
اول ماعرفته ماكنش بيفارق ايديا
كل ماتيجى على بالى فكرة ولا تهف الحالة عليا
ازعل .. اتقمص..اجرى على الاسكتش الاحمر
                          ....
الاسكتش الاحمر كان فيه استك
بقفل بيه على احلامى تقولش قفل
هو انا قلت احلامى !!!
يااااااااااااااااااااه قصدى اوهامى
كنت فاكر انى لما اكتب ماهما اكتب استكه هيدارى بلاوى
بس من يوم ما الاستك اتقطع وانا قلت عليه السلام
 اصل اسكتشك زى صاحبك
 لو مدراش لا مؤخذة عيبك يبقى ماينفعكش
            ............................
الاسكتش الاحمر لسه خط حبيبى فيه
يوم ما قالى اول كلمة حب ويوم ماسبنى كتبلى فيه
انا كنت فاكرة العيب عليه
             ..........................
الاسكتش الاحمر كنت دايما اخاف عليه
بس عمره ماخاف عليا
بس حتى لو ....
مش هى دى القضية
الاسكتش الاحمر يوم ماضاع ونسيته على القهوة
رجعلى تانى وفقه هدية
           .........................

طول عمرى بكتب فيه عنه كلام يدوخ
لكنه ماخدش باله
ويوم ما كتبت عنه كلام يوجع شافه
ومن وقتها زعل وهرب ومعرفش حتى ايه احواله
                     ............
يااسكتش ياحمر خالى عندك حبة من الاحمر
عارف يا اسكتش يااحمر انا مش هدور عليك تانى
ولا عمرى هاكتب فيك من انهارده شعر تانى
انا دلوقتى اصلا بكتب فى اسكتش تانى

ليست هناك تعليقات:

إرسال تعليق

رايك اية