غريبة انك نفس الحد اللى بكلامه بيأثر فيا
وانت نفس الحد اللى بيقتلنى بسكاته!
أنت اللى بحس أنك أعظم أنسان بتفكيرك
وأنت اللى بيحبطنى فراغك!
سؤال بجد
هو أنت مين؟
هو انت ونسى ؟
ازاى وانت اوقات بتكون وحدتى!
بتشوف السما زى مابشفها انا ؟
بتحب المطر ازاى وانت والبحر مش صحاب !
عارف ...
بتضايق لما الاقى كل واحد فينا راح فى طريق بين ال اه وال لا
بس برجع تانى وأفرح بسرعة عشان بنتلاقى فى نفس النقطة فى النهاية.
عارف ..
نفسى مايبقاش فى نهاية.
بخاف أوى من الكلمة دى .
عارف...
أوقات بشوفنا حاجة واحدة .
أوهامك نفس أوهامى .
أحلامك هى هى أحلامى .
طب ليه منحققهاش سوى ؟
ليه مننزلش على الارض ؟
نشوف كل حاجة سوى بعين تانية
ونرجع نثق فى بعض .
بس ازاى وكل واحد فينا مش عارف التانى فين ؟
ازاى وأنا لسه مش قادرة افهم انت مين ؟
أنا ليه بقولك كل ده وليه بوصفك ؟
وليه بتشوف وصفى غلط ؟
أنا معرفش بحبك ولا بكرهك .
أه بكرهك طول ما بتشوف حبى عبط.
نفسى أكون عارفة أفهمك ..
نفسى مرة تجاوب عليا لما أسالك ..
هو أنت مين ؟
